Mikið lifandi skelfingar ósköp.....

..er gott að sitja hérna með kaffibollann í pásu. Aldrei þessu vant er þetta bara ágætiskaffi hérna á Engjateigi. Aldrei að vita nema að ég vakni bara núna upp frá Bach-þreytunni og taki góða törn til klukkan eitt. En þá kemur Halldóra og rakkar pottþétt allt niður sem ég var að æfa....nei nei bara grín, hún er nú ekkert vön að gera það.
Annars er mér ekki farið að lítast á þessa kaffidrykkju mína. Í FÍH er mikið lagt upp úr því að drekka kaffi í pásum á morgnanna. Þetta veldur því að ég verð að fá mér kaffi þessa morgna sem ég er hér á Engjateigi. ...Þar af leiðandi gæti öll þessi kaffidrykkja orðið til þess að ég verð háð kaffi og er alveg ónýt á morgnanna áður en ég fæ mér kaffi. Þessi þróun veldur mér áhyggjum. Ekki vil ég verða háð kaffi...nóg er nú að vera háð kóla light! Shit! Ég er slæm manneskja....og í gær keypti ég ís og át snakk og kók og oreo kex og...og .....og....það var bara miðvikudagur! Sussum svei. Hefur einhver ráð handa mér? Á ég að drekka eitthvað annað en kaffi eða á ég bara að halda áfram að drekka kaffi til að vakna?

Nú loksins.....

...blogga ég. Nú loksins á ég að mæta fyrir framan kennara og syngja upp úr FSSS á nótnanöfnum en ekki söngheitum. Nú loksins þegar ég fæ það, uppgötva ég hvað ég er orðin vön hinu og að syngja á nótnanöfnum er erfitt. Erfitt fyrir mig sem ekki er vön því.
Annars þá er ég þreytt. Ég er þreytt alla daga. Samt er ég á fullu alla daga. Kannski er ég þreytt af því að ég er á fullu alla daga. Gæti hugsast.
Kennaradeildin tekur á nú þegar. Ef til vill er það ekki kennaradeildin sem tekur svo á, heldur sú staðreynd að ég sá litli frítími sem ég hef á daginn fer í að reyna að æfa. Ég er stöðugt að troða inn klukkutíma hér og klukkutíma þar, í æfingar á píanóið. Svolítið erfitt að samræma þetta allt saman. En það hefst allt með mikilli orku.
Um helgina fór ég reyndar í góða æfingaferð á Selfoss. Þar fékk ég heilan flygil út af fyrir mig og svo fékk ég kaffi og með því og átti alveg frábæran dag á Selfossi. Var boðið í kvöldmat og eftirrétt....sem Leifur útbjó. (Finnst það verða að koma fram, hann var svo stoltur af sósunni sinni) Við eigum pottþétt eftir að endurtaka þetta, vonandi oft, og skella okkur svo í pottinn eftir á, sem væri náttúrulega algjör snilld. En nú er orðin svo þreytt að ég ætla að hætta. Ef ábyggilega aldrei skrifað svona lélegt blogg.

Over and out.

Hver man eftir þessum bæ?

Ég er búin að vera að hlusta á lagið frá þessum bæ í gær og í dag. Búin að vera að hlusta á það á hollensku og sænsku. Skemmtilegt!

Hakuna Matata........

Eru orð sem ég þarf virkilega að tileinka mér í dag. Sérstaklega þar sem ég er að ná í og búa til lagalista með disney lögum. En á morgun er fyrsti dagurinn minn í "nýja skólanum". Kennaradeild FÍH. Ég er svo svakalega stressuð. Ég skil þetta eiginlega ekki. Ég held að mér líði eins og einni lítilli stelpu sem ég heyrði um um daginn. Stelpan sú var að byrja í fyrsta bekk. Hún var svo svakalega kvíðin að fara í skólann. Þegar foreldrar hennar fóru að ganga svolítið á hana og spyrja hvers vegna í ósköpunum hún væri svona kvíðin þá sagði hún ofsalega lítil í sér og hikandi ".........því ég kann ekki svarið við spurningunum". Sem betur fer á stelpan eldri systur í 6. bekk sem bjargaði málunum og sagði henni nú að það væru engar spurningar í 1. bekk. Þetta væri bara eins og leikskólinn. Það gerði nú lítið til að hugga stelpuna og þá sagði hún enn minni í sér "..en ég veit ekki hvar ég á að sitja".

Mér líður akkúrat svona. Ég veit ekki svarið við spurningunum! Ég þekki ekki muninn á mollsjöundarhljóm og dúr með lækkaðri 9und. Ég rugla öllu saman! Það verður svo mikið að gera hjá mér! Shit!

Leifur er reyndar búin að segja að ég megi koma stundum með í Fljótshlíð og sitja og læra. Þó ég æfi mig kannski ekki mikið þar. Reyndar átti ég hugmyndina, en honum fannst hún sniðug. Svo má ég víst æfa mig um helgar á Selfossi. Já, já, þetta verður allt í lagi.........

.....hakuna matata!

Sælir lesendur.

Nú er ég búin að setja saman stundatöfluna mína í vetur og mun ég nú kveðja flest félagslíf í bili...

bless.

Af þessum orsökum mun ég hljóta hina verstu vöðvabólgu og hver sá sem vill heimsækja mig á síðkvöldum (eða bara svona venjuleg kvöld þið vitið) og gefa mér axlanudd á bara að banka upp á. Hér er alltaf heitt á könnunni.

Lifið heil.